中國球員 香港發展 不知何處是吾鄉

 

相關連結： 【效力八年】退出非反韓 白鶴：球員唔係工具 只想踢波 http://bit.ly/2nuhZBE 何處是吾鄉？ 白鶴，三十三歲，東方龍獅足球員，司職防中。由內地轉戰香港後，在金判坤麾下奪過三次聯賽冠軍，及在前年兩次「中港大戰」正選上陣，逼和國家隊，贏得港人掌聲。但早前失落港隊廿三人名單，更因此聲言以後不為金教練效力，被外間指他「反韓」， 受到球迷質疑。在中港之間，他到底根植何處？ 十年前，我喺四川踢甲組，但教練足足半年唔俾我出場。嗰陣我先二十歲出頭，連實戰機會都無，邊有得進步？結果同教練鬧翻。後來經理提議我去南華三個月，落場踢番起狀態，先再返大陸。嗰時除咗識成龍同周星馳，對香港完全無印象，更加唔使問我咩係南華會，總之有得踢就去。 本來只當呢度係跳板，點知完約後老闆羅傑承不停親自搵我傾，勸我留低。做球員，有咩開心得過有個咁珍惜你嘅人？結果，半個足球生涯都喺南華。裡面仲遇到阿Kim（金判坤），去港隊又係佢做教練。雖然佢又強硬又嚴，不停鬧人，但偏偏成日讚我。佢教訓啲後生仔時，會同佢哋講：「你哋學吓白鶴，睇吓佢點踢啦！」 多得遇到伯樂，喺香港一留十年，足球生涯最重要時刻喺晒呢度。但有得必有失，為咗呢個城市，我都被迫放棄唔少嘢。 我爸爸以前係運動迷，屋企個電視永遠都係睇CCTV體育台。我四歲喺幼稚園就鍾意咗踢波，雖然屋企唔算有錢，但爸媽都好疼錫我，俾錢我去學。甚至俾我去體育學校寄宿，上晝上堂，下晝訓練，好快就入咗中國青年軍。 無奈家鄉石家莊無甲組球隊，想做職業球員，一定要出去闖。嚟到香港，更係一年先返屋企一次，要和老婆同女兒分開，更無得照顧爸媽。每次放完假要返香港，阿媽都喊住講再見。係好唔捨得，但呢個始終係我嘅事業。 一三年，石家莊終於有第一支甲組球隊，為咗屋企，我第一時間加盟。隊入面有年輕時熟悉嘅教練，又有以前青年軍嘅隊友，球迷見到河北人回鄉踢波，更加高興，無當我外人。以前嘅回憶返晒嚟，真正感覺到嗰度先至係家鄉。 但喺中國，好多嘢自己都無辦法控制。一五年，中國足總突然改例，將踢過港隊嘅中國籍球員當外援，我份約隨即終止。突然變成「異鄉人」，又要同父母講再見。 最後惟有返嚟香港，我嘅另一個「足球家鄉」。雖然呢度無人無物，好多時夜晚都係一個人泡吓茶，做吓gym。但間唔中有班忠實球迷搵我食飯、打邊爐，已經覺得窩心。 我嘅足球生涯就快到最後階段，但我仲好有能力，想繼續披上港隊四號球衣，為呢個城市作戰。但阿Kim今次唔揀我不特止，佢個翻譯仲話：「就算再揀你入去，都唔會有機會出場。」好似當我係工具咁，好失望。 再踢多幾年，我都要退役。到時要留喺邊一個「家鄉」，我仲未有答案。 撰文：關冠麒 攝影：葉漢華 攝錄：李育明 壹週Plus : http://hk.next.nextmedia.com 即 like 壹週Plus fb : http://www.facebook.com/nextmagazinefansclub